Umntwana okhubazekileyo uthola ukudla, impahla zesikolo

Liberty Mutamba
USIPHO Ndlovu (Akusobizolakhe) five years ubeyindlubu ewelephokweni kubosowabo nanko pela ubelokhu egqoka impahla zekhisimusi esikolo, lokhu bekudalwa yiminwe emifitshane yangekhaya.
Umntwana lo, olejwabu elimhlophe bekungamhlabusi ukuya esikolo seMapate Primary ngalezo mpahla. Konke lokhu sekuzaba yimbali ngemva kokuba uNdlovu athengelwe impahla zesikolo, ukudla, ingwalo, lokubhadalelwa indleko zesikolo ngomunye umama odabuka kulowo mango.
Abafundi bavame ukunanzwa ngempahla zesikolo kodwa esakhe isimo besehlukile ngoba engelazo lezo mpahla zesikolo. Ubephuma egqoke ezangkhaya esuka koRamnoana eqonda eluphekise eMapate Primary.
USaviour Maphosa (NaPrayer) usekhethe ukuncedisa umntwana lo, ukuzefeze amaphupho akhe ngokumthengela impahla zesikolo, ukubhadala indleko zesikolo, ukudla lokunye okungamncedisa esikolo.
“Mina ngakhula ngincediswa esikolo. Ikakho lami sehlose ukuncedisa abanye abantu ikakhulu abantwana abadinga uncedo Ngakhuluma lenhlanganiso ye Nkomwa Foundation Trust yiyo eyanghlanganisa lomngane wami lo. Ngiyathaba ukuba ngincedisa umntwana wakithi lapha koRomoanwana.
Ukuncedisa abanye ngibona kuyisiphiwo engazalwa ngisifumbuthe. Ngincedisa umntwana wasekhaya ngoba akula muntu ozasuka phandle kwelizwe ezoncedisa abantu bakithi. Ngokuncane engikutholayo ngoba ngikwabele abanye, ngifisa ukuthi abanti abaphandle besithole sincedisana hatshi ukuthi sihlazi silinde bona,” kubika uMaphosa.
Umama womntwana uNelia Munhundarimi-Siziba uveze ukujabula esithi yena ubezama ngendlela zonke kodwa kumkhama.
“Ukukhulisa umntwana ole jwabu elimhlophe kunzima, ngoba indingeko zakhe zinengi. Bekungizwisa ubuhlungu ukumu hambisa esikolo eqgoke impahla zangekhaya. Ukumbona sefqoke impahla zesikolo kuyangijabulisa. Ngikhulekela ukuthi isipho lesi singapheleleli kimi kuphela. Sengilethemba ukuba sezafunda ekhululekile kubangane bakhe. Izandla zedlula ikhanda, njalo ngithabe kakhulu,” kubika uSiziba.
Umntwana lo, olejwabu elimhlophe wananzwa yinhlanganiso yeNkomwa Foundation Trust ekhangela ngabantu abakhubazekileyo. Sixoxe loMonitor Ncube oqoqa inhlelo kulinhlamganiso.
“Sifisa ukuba abantu abakhubazekileyo bethole indlela zokuzithuthukisa. Siyenelisa ukubaxhumanisa labantu abangaba siza lapha laphana. Njengenhlanganiso sihalalisela umntwana wethu osethole umama ozamncedisa esikolo. Sezafunda ekhululekile.
Inhlanganiso yethu ikhangela inhlalakahle yabantu abakhubazekileyo. Sikhangele kakhulu ukuba bengabandlulwa njalo benikwe amathuba afana lomuntu wonke esigabeni.