NDEBELE — Ilunga lePhalamende elimele iKwekwe Central, uJudith Tobaiwa usekhuthaze Ugatsha
Lwezokwemba ukuthi lususe isikolo seGlobe and Phoenix Primary ukuze kuqedwe uhlupho
lokwemba phakathi kwesikolo okungekho emthethweni njalo ukuthi kwenqatshelwe umsindo ovela
ekubhoreni lokudubukeni kwamahola.
UTobaiwa ukhulume lokhu ngemva kokwethekelela isikolo lesi ngoMvulo ngesikhathi efuna ukuzwa
ukuthi izibane azifaka esikolo ziyasiza yini.
Ilunga lePhalamende leli lasebenzisa ingxenye Yezimali Zokuthuthukisa Isigaba (CDF) ukufaka izibane
esikolo esasihlala sihlaselwe ngotsheketsha abayabe behlome ngamabhemba. Otsheketsha laba
babethola amathuba okugebha ngaphansi kwezindlu zokufundela bedinga igolide ngoba
kwakulomuntu oyedwa olindayo njalo kwakuyabe kumnyama.
Ilunga lePhalamende elimele iKwekwe Central licebise ukuthi Ugatsha Lwezemigodi Lentuthuko
Yezokwemba kumele lususe isikolo kumbe luvale umgodi ukuze abafundi bafunde kungela lutho
olubaphazamisayo.
UTobaiwa uthe, “Khathesi silomgodi ophakathi kwamamitha angaphansi kwekhulu (100m) usuka
esikolo, … bayabhora njalo bedubula amahola abantwana bephakathi kwezifundo okuyinto eyingozi
kakhulu…Ugatsha kumele lungenele, lubone ukuthi kungenziwani.
“Singasusa isikolo sisise kweyinye indawo ephephileyo ebantwaneni besikolo ngoba lesi yisikolo
sabantwana abancane kumbe abembayo bayekwemba kweyinye indawo. Okukodwa phakathi
kokubili kumele kususwe ngoba sokusiba yingozi. Otsheketsha bemba santando ngenxa yokuthi
kulemali kule indawo.
“Nxa kuvuma, Ugatsha Lwezokwemba kumele lwenze umsebenzi walo lususe isikolo lusise kweyinye
indawo ukuze kuvikelwe abantwana besikolo.”
UTobaiwa uthabile ukuzwa ukuthi ngemva kokufakwa kwezibane esikolo, akukabi lezindaba
zabotsheketsha abahlasela isikolo bedinga igolide.
NDEBELE
Ilunga lephalamende liqhubeke lathi, “Umphathisikolo wenza isicelo ngoba kwakungela izibane
esikolo. Ngasebenzisa ingxenye yeCDF ukufaka izibane ezigqagqele isikolo sonke ukuze kuncediswe
olindayo okuzakwenza ukuthi abantu abahlala esikolo babone otsheketsha nxa sebegebha igolide
esikolo.
“Sikhuluma nje, umphathisikolo uqinisekise ukuthi ukufakwa kwezibane sokuncede ekulwisaneni
laloluhlupho. Okwakhathesi konke kuhamba kahle. Otsheketsha kabasekho esikolo kodwa lokhu
akweneli. Kudingakala ukuthi Ugatsha lungenele kuloludaba. ”
Umphathisikolo weGlobe and Phoenix Primary u-Isaac Bvupajena ubonge uTobaiwa ngokupha
isikolo izibane njalo wasecela abaphathi bemigodi ukuthi bagqibele amagodi atshiywa evulwe
ngotsheketsha.
Isikolo besihlaselwe ngotsheketsha ababesemba esikolo okungekho emthethweni okuyinto
ebingabangela ingozi enkulu ebantwaneni.
Isikolo lesi esiseduzane lenziki yedolobho sigonjolozelwe yimigodi esebenza ngokusemthethweni
njalo kucatshangelwa ukuthi imilindi yayo ihamba ngaphansi kwesikolo.
Izakhiwo zezifundo lokunye okufana lezivande kanye lenkundla yebhola lenyawo sokwatshabalaliswa
ngotsheketsha abavame ukwenza imisebenzi yabo ebusuku.
Indaba le ihumutshelwe elimini lwesiNdebele yiMidlands State University National Language
Institute.
