Inhlanganiso yeZimbabwe National Chamber of Commerce eMidlands ihloniphe
uSikhwicamfundo Emeritus uNgwabi Mulunge Bhebe onguye owaba Ngumsekeli Kanhloko
weMidlands State University wakuqala kanye loMavis Koslek owasungula i-Image Modelling
Agency.
Laba ababili, kanye lomnikazi weDendairy, uNeville Coetzee, baphiwe izicoco zokwenza kuhle
empilweni ngemisebenzi abayenzayo ekuphakamiseni isabelo seMidlands emisebenzini yabo.
UBhebe, obengumhlonitshwa kuhlelo lolu, uthe ilizwe liqhubeka likhangelane lenhlupho
ezehlukeneyo kwezamabhizimusi, ngakho-ke, kuqakathekile ukuqhubeka sisebenzelana
ndawonye ukuze kutholakale izixazululo ezizaphathisa okwesikhathi eside.
Ilunga lebhodi yeZimbabwe Mass Media Trust (ZMMT) lithe uhulumende emelwe Lugatsha
Lwezamabhizimusi Lokuthengiselana kanye Logatsha Lwezemali Lokuthuthuka Komnotho
ukhathazekile ngokuguquka kwentengo kanye lokukhula komnotho njalo uzaqhubeka esebenza
labo bonke abaphathekayo ukuze kube lokuhlaliseka lokukhula komnotho.
Uthe okwakhathesi, amabhizimusi akhathazekile ngokususwa kwamalayisensi okuthenga
impahla ezivela phandle kwelizwe.
Uthe, “Loba sincoma ingqubelaphambili yamabhizimusi ekhanya sobala ngoba impahla efika
isilinganiso sokungamatshumi ayisikhombisa (70%) ethengiswa ezitolo yenziwa kuleli, abenza
ngokwamabhizimusi kweleZimbabwe bakholwa ukuthi ukukhitshwa kwemithelo yempahla
ezithengwa phandle kwelizwe kuluhlupho”.
UBhebe, olilunga lamabhodi amankampani amanengi, uthe ukumiswa ukukhitshwa kwemithelo
yokuthenga impahla phandle kwelizwe kuzakwenza ukuthi kwande indingeko yemali
yakwamanye amazwe eyokuthenga impahla elungiswe yaphelela evela kwamanye amazwe.
NDEBELE
Uthe njengoba imithelo yalokho okusetshenziswa ukulungisa impahla okuthengwa phandle
kwelizwe ilingana lemithelo yempahla epheleleyo ethengwa phandle kwelizwe, lokhu kwenza
kungabi lokulingana kwamathuba okusiza kakhulu abathenga impahla epheleleyo phandle
kwelizwe.
Uthe, “Lokhu yikho okwenza kube lokwanda kwabawodisa impahla labathengisayo abaqhuba
amabhizimusi abo besebenzisa imali yakwamanye amazwe”.
UBhebe uthe kulendingeko yokuthi kuthuthukiswe umkhuba wokuziphatha kuhle kwezizalwane
zeZimbabwe eziqhuba amabhizimusi.
Uthe, “Ukuze ilizwe lethu lithuthuke, osomabhizimusi kumele bakhokhele ekwenzeni ukuthi
umnotho uqhubekele phambili kodwa ngasikhathi sinye betshengisa ukuqina lokubambelela
ngokuqinileyo emithethweni lezimiso ezilawula ukusebenza kwabo” .
UKoslek useleminyaka engamatshumi amathathu lanhlanu (35) ekubhizimusi lokumodela.
I-ZNCC iphinde yahlonipha amankampani enza kuhle eMidlands agoqela iMahogany Light and
Sound esigabeni sokuphathwa kwemicimbi, i-Utande ephiwe umvuzo wakuqala kwezobuciko
kanye leMidlands State University esigabeni semfundo yaphezulu.
Abanye abaphumeleleyo bagoqela iMimosa Mine, u-Ambrose Mutiunegwande, uLawrence
Mavima (Jnr) kanye leParkview Junior School phakathi kwabanye.
Indaba le ihumutshelwe elimini lwesiNdebele yiMidlands State University National Language
Institute.
