ZANU PF, iilinjiyo yakajana zyuuno zyiingi zyaBiiminini baPalyamenti muChilikiti chaMidlands
munsaaluuzyo isweenene yakazwa akuchitwa chiindi chifwiifwi chayinda yakajana zyuuno
zyabiiminini banji baseneti, babachikayintu alimwi ababachikula.
Kabunga aaka alimwi kakajana zyuuno zyiingi mukkansili yachilikiti.
Fredrick Shava ngumwi wabane maseneta biiminina Zanu PF muMidlands antoomwe aTsitsi
Muzenda, Maybe Mbohwa aDaniel Mackenzie Ncube, mpawonya CCC yiimininwa aSisasenkosi
Ndebele alimwi awakali mutobeli wasilutwe wamutabi wafulumende muchiindi chafulumende
waLukamantano lwaChisi, Sesel Zvidzai.
Kuli aabo bakasalwa kabiiminina bachikayintu, Zanu PF yiimininwa aVairet Nhari, Perseverance Zhou,
Rutendo Mpofu alimwi aTsitsi Zhou, mpawonya CCC yiimininwa a-Emma Muzondiwa alimwi aSekai
Marashe.
Lubo, Kudakwashe Mnangagwa nguwe Wiiminina Bachikula, uli alikke ubiiminina uuzwa muchilikiti.
Zanu PF inooli abiiminini bakkansili yachilikiti bali musanu awumwi (6), mpawonya CCC inooli abane.
Kkansili yachilikiti iswanizya simabbindawuko wakuKwekwe Kandros Mugabe, Colleta Mutambisi,
Ernest Samson, Melania Mahiya, Maud Ngwenya alimwi aPhinias Makombe biiminina Zanu PF,
mpawonya CCC yiimininwa a-Angeline Muzhinyi, Senima Msindo, Jubilee Mutyanda alimwi aDenias
Mudzingwa.
Sichuuno waZanu PF muchilikiti Larry Mavima, ooyo wakaziliinga kayiminina kabunga kakwe, wakati
kubalwa akulangisisya kwakubalwa kwakachitwa munzila mbotu alimwi iili atambalala.
Wakati myeelwe yakeendelana ayeyo yakali yabambwa akabunga kaZimbabwe Electoral
Commission (ZEC).
“Wakali mulimu mupati wakabweza chiindi chilamfu kuti bazwe amyeelwe itwaseme…twakali
kulindila chakutakkalinkana pele chimwi chiindi nkubotu kulindila kuchitila kuti kuzwe mpindu
mbotu,” wakaamba oobo.
Mavima wakati bakazunda zinywisya maanzi akaambo kakubeleka changuzu.
“Twakalitondeezya kuchisi kuti tulikabunga kazyandamene kabantu kali kuzuzikizya eezyo ziyanda
bantu alimwi bantu kakabajana alimwi akubaambila kuti bweendelezi bwabo bupya nzizili
nzibwakazuzikizya,” wakaamba oobo.
Sichuuno wachilikiti wakati kabunga kazumenene takakolyookezya pe kubeleka changuzu mbukunga
kabunga kaCCC kwakaboneka kuti lako kakajana bantu banji.
“Eechi nchiindi chakuti tubweede lubo tukalibambilile alimwi akuzwa anzila zyakuyungizya myeelwe
mu2028 kuchitila kuti tukkale katuli kubuzuluzi buya nembo.
“Eechi teensi chiindi chakulyookezya… tulabotelwa alimwi akusekelela kuti Muzulwidi waNyika ba-
Emmerson Mnangagwa batupa mweenya wakuti tulitondeezye kuti nchobeni tulikabunga
kazyandamene bantu nkibeelede kutobela. Nkabunga kamuntu woonse peepe kabaabo baZanu PF
pele beni chisi baZimbabwe boonse,” wakaamba oobo.
CCC yakiimvwilidwi awakali mwiiminini waMbizo Settlement Chikwinya.
Mulumbe ooyu wakasandwidwa kuChiTonga aMidlands State University National Language Institute
